PENCEŞÊRA EVÎNÊ
Helbest: Hinara Tajdin
PENCEŞÊRA EVÎNÊ
Penceşêra evînê,
Mîna tora mircanê,
Ketîye ser sîng, berê min
Sotye dil û cergê min.
Jan û êşa birînê,
Te peydekir narînê,
Dizêrînî hestên min
Diçikînî bîna min.
Mîna tilya zerbûye,
Ça sor gulek vebûye,
Wextê jorda kubar tê
Ziravê min diqete.
Evîna har dûr û kûr.
Bûye çeper, bûye sûr,
Ew mînanî decala
Rima davê nav dila.
Hestê dilêm dihêre
Kîn, hêrsa xwe diqûre,
Pencê royê dikene
Dibe sebir, sekane.
Bûm aşiqê wî dilî
Dêmê wêye gul-gulî,
Nebî dikin lomana
Bo hekîmê Lokmana.
Ken hate ber devê min
Çerxda xwîna cergê min,
Yaram ça hat hêwirî
Ruh qalbda zivirî,
Hîva çarda nav şevê,
Kenê şirîn şer lêvê,
Derd û kul lê nereve
Cerg, dila girt qirave.
Ez zivirîm jîyanê,
Ketm tora evînê,
Kenîyam tevî narînê,
Nav hemêza gerdûnê.
Roya zerîn şewq veda
Min berê xwe da Xweda,
Rabûm çûme ez hecê
Ketme doay û recê.
Çûm ber dara miraza,
Bidime bê mereza,
Daxwez, dîla wan bikim
Wê behrêda xwe morkim.
Vekim sîngê tey mermer,
Maçkim gerdena qemer,
Serî daynim ser mila
Guh bidim rîtma dila.
********************
EWLADÊN BISTANÊ DÊKÎNE
Zerdeştîme, goran, soran, zazame,
Êzdî, loran, gula berpala çîyame.
Kilama serbest herçar deverame,
Kanîya av sare zelal yekîtîyême.
Niqitke xwîna egît, şehîdame,
Sehîd Riza, Dewrêş, Mîrze Zazame.
Hêsira destana Memê, Zînême,
Tîpek pênûsa Ehmedê Xanîme.
Axîn û nalîna Sîyabed-Xecême,
Ez nifirçyê ewî gakûvîme.
Serhadî, Silêmanî, Dihokîme,
Dinîya derewînra hewar, gazîme.
Dil bi xwîn birîndarim, Şengalîme,
Bi hêzim berxwedana Kobanême.
Bûka rûbi xêlîya Efrînîme,
Çiqileke dareke zeytûnême.
Herro li benda rizgarkirinême,
Benda dîlan, govenda kurmancame.
Dengê Şero, Cizravî û Efome,
Benda hina destê bûk û zavême.
Benda dara miraza xemilîme,
Bûk û berbûka, siwuarê cirîdame.
Bîrnekin bira, em KURDİSTANÎNE,
Em ewladên ber bistanê dêkîne.
Me teva mêtîye ew şîrên tiberke,
Axa pîroz bo me temama heqe.
Bila dijmin neheqîya xwe me neke,
Destê qirêj ji qedera me veke.
Dayîk ber, pêsîra li ber me veke,
Şîn û girî îdî tû wextî neke.
Zîyan, zirarê dijminatî nedin me,
Nezêrînin, çev şil nekin daykên me.
Hovîtîya xwe ji qedera me berdin,
Em azabin ewan azar û derdan.
********
Xelat
