SEBEB ÇÎYE ?
Helbest: Hinara Tajdîn
Xarîta topa wê dinê,
Boyax dikin sor geveze,
Cihan bo çi mera tenge
Timê kerr, lal û bê denge,
Bê deng û hiz ew der, cînar,
Dukjin xortên me bejn çinar,
Nabişkivin ew dar hinar
Pel pirûz, girî têne xwer,
Her miletek bûne dewlet,
Ew nagrin mera hurmet
Û nadne me ew tû qîmet
Nemaye me îdî tewat,
Dijmin timê me ne razî,
Sor dikin axa pîrozî,
Mîna wawik û berazî
Gelo tu çi me dixwezî ?
Heya kengê histûxwerbin,
Dest dirêjî bîyaniya kin,
Her carî parsekîyê bikin
Dilê neyarên xwe şakin,
Rabin,hevra bi yek dengî,
Xwekin cilê hezar rengî,
Heftê mîlyon şox û şengî
Kivşkin maqûl, serkêşekî,
Herçar bira nêzî hevkin,
Sûrê orta wanda rakin,
Rê em li ber hevdu vekin
Dijminê xwe tunebikin,
Em nebin destmala desta,
Destên ereb û tirkada,
Kurdistana xwe rengînda
Bijîn emjî azadiyêda.
XELAT
