MIN DÎT WEXTÊ SEHER
![MIN DÎT WEXTÊ SEHER](https://www.xelat.org/uploads/images/2024/05/image_750x_66434c56d6f7e.jpg)
Helbest: Baqî Berûkî
Min dît wextê seher, horîya dêmqemer
Ji bircê hate der, wekî find û fener.
Ronî da çar teref, dilbera sîngsedef
Sîne êm kir hedef,can li me kir telef.
Horîya bihuştê, derket seyr û geştê
Ji wê ve bimeş tê, ew xezala deştê.
Bimeş tê ew perî, zulfên reş du kerî
Pirr dîn kirin zerî, wekî min serserî.
Ew çavên reşbelek, ebrû lê bûn xelek
Ji vê xana felek, ewê kuştin gelek.
Ebrûhîlal şevê, kenê şêrîn devê
Gerden ji ya kewê, sewda kirim ewê.
Du biskên temberî, ser enya keverî
Berdane li berî, aqil bir ji serî.
Zerîya kofî kêl, narîna bisk bitêl
Xan û man û bi êl, şepal şeng û kihêl.
Bi bejn û qametê, husn û zerafetê
Lêv şîr û şerbetê, horîya cennetê.
Borîn çend sal û wext "Baqî" qet nedî bext
Dilê min yê mişext, wê jixwere kir text.
12/10/2022.Sêrt.
XELAT